Mar 2 | TPA | STEP | Maratom egha ita magha ma Yesu a tauvotagho maitehi hi wanavirahi au Caponiam. Ma rava maghamaghauhi hi nonori da i wanavirameeiya'i au meyagai,

Mark 2

Yesu, Rava Opina Hirahiraghena i Viyawahani

(Matthew 9:1-8; Luke 5:17-26)

1 Maratom egha ita magha ma Yesu a tauvotagho maitehi hi wanavirahi au Caponiam. Ma rava maghamaghauhi hi nonori da i wanavirameeiya'i au meyagai, 2 po rava hi nene'i yana numa hinenina po mata'eta maiteni hi vihowai ma i rauguguya auwarihi. 3 Ma rava wahepari turahi opina hirahiraghena hi pawe neiya'i auwarina. 4 Ma rava maghamaghauhi hi rautomenihi, po egha emo'emosina Yesu auwarina hita ghe'eta. Aubaina numa upunei hi amghaena autepana, ma gavogavo hi dewai Yesu autepana ma aunaona hi tere gha'irei. 5 Anima yamna aubaina ahi vitumaghana* i inanai ma ravana opina hirahiraghena i riwei ipa, “Natu'u, am dewabo'a a nuwa'aharei.”

6 Nahidana mai Judea* ahi raugagayo tauvihanahanapuweina hi ma'ama'ae, yana au nuwanuwahi hi ampiri we nana'arena hipa, 7 “Aiwa aubaina we ravana nana'arena ei babani? Ei jibogha! Maimaituwa tau'avana dewabo'a taunuwa'ahareina!”

8 Mara emosi Yesu aruwanei me hi vinuwanuwatuhunei i hanapuwei po i riwehi ipa, “Aiwa aubaina po we nana'arena oi nuwanuwatuhu? 9 Metauna i te'ate'a? Ravana opina hirahiraghena ata riwei da, ‘Am dewabo'a a nuwa'aharei,’ bo ata ripa, ‘Ma vomahiri po am ani'eno ma'avarai ma ma nae’ ? 10 A viheghemi po ona inanai, da ta'u yana Rava Natuna taniwaga auwari'u e ma'ama'ae, po dewabo'a a nuwa'aharei.” Anima ravana opina hirahiraghena i riwei ipa, 11 “Tam ma vomahiri po am ani'eno ma'avarai, ma ma nae am au numa!”

12 Anima atapuhi hi iya'iyauwei, ma mara emosi i vomahiri po a ani'eno i rau'avarai ma i ne'aharehi. Atapuhi ahi amhuna i kwaha ma Maimaituwa hi vohepahepai, ma hipa, “Egha meyanai ginauri we nana'arena ata ina'inanaiya i tupuwa!”

Yesu, Levi i Vinei

(Matthew 9:9-13; Luke 5:27-32)

13 Yesu, Caponiam meyagaina i vomahiri ahare po i naeme Galilee au gerahana. Ma rava maghamaghauhi hi ne'i auwarina ma i vikare po i hanahanapuhi. 14 Maranai i naenae yana rava wavana Levi, Alphaeus natuna i inanai a au anibagibagi takisi i tamatama. Yesu i riwei ipa, “Ma votagho'u.” Egha baine i vomahiri po i votaghoi.

15 Maranai Yesu, Levi ana au numa i am'am, ma takisi tautama ^{▼▼2:15tax collectors} maghamaghauhi ma taudewabo'a hi muritaghoi, ma wate Yesu a tauvotagho maitehi hi am gogona. ^{▼▼2:15Moses Maimaituwa a raugagayo* i girumi, ma raugagayo tauvihanahanapuweina we raugagayona hi viponavowana vaimahi'eni. Ma wate mai Judea* ahi dewa ghehauhi hi vi'ate'ate dumahi. Hipa, “Aiyavo ravahi raugagayo egha hitai ate'atei yana rava apo'apoehi.”} 16 Ma Pharisee* ghehauhi yana raugagayo tauvihanahanapuweina, hi inanai ma i am'am takisi tautama po taudewabo'a maitehi, ma a tauvotagho auwarihi hi raubayada hipa, “Aiwa aubaina takisi tautama ma taudewabo'a maitehi e am'am?”

17 Anima Yesu we i nonori yana i riwehi ipa, “Rava ahi'ahihi yana egha tauviyawahana hita ghoheghohei, ma rava doridori'ahi yana tauviyawahana hi ghoheghohei. Ta'u egha rava dumadumaruhi ghorenahi aubaina ata ne'i ma ta'u yana taudewabo'a aubaihi a ne'i.”

Raubayada Huji Aubaina

(Matthew 9:14-17; Luke 5:33-39)

18 Maratom emosi yana John Taubabataito* a tauvimuritagho ma Pharisees* hi hujihuji. Ma rava ghehauhi hi ne po Yesu hi raubayadei hipa, “John a tauvimuritagho ma Pharisees ahi tauvimuritagho he hujihuji. Ma aiwa aubaina po tam am tauvotagho egha hita hujihuji?”

19 Ma Yesu i riwehi ipa, “Maranai rava tautavinevou awana maiteni he ma'ama'ae, yana ana rava egha hita hujihuji babana tauna maitehi he ma'ama'ae. ^{▼▼2:19Hosea 2:19-20; Ephesians 5:25-27; Revelation 21:1-4} 20 Ma mara e nene'i yana tautavinevou orotona apo auwarihi ma hina vaina aharei, Yesu hina vihiragheni ma na au marana apoma hina huji.”

21 Wate i riwehi ipa, “Egha meyanai gara vouna hina vaini po gara 'wadubona wanawana hogirana auwarina hina popoi, babana apo ina roroi ra'ara'ahi. ^{▼▼2:21Gara vouna ma 'wadubona hirahiramaratuna maranai hina oghai yana apo vouna ina amtaina ma 'wadubona ina wanaroroi.} 22 Nana'arena wate apo egha meyanai wine* vouna hina vaini po huma 'wadubona, auwarina hina terei babana, i 'wadubo apo egha ina amriyana. Babana wine vouna viboyana apo ina dewai po ina wanaroroi, yamna anona yana ruwaghahina wine ma anihumana apo hina apo'apoe, egha po wine vouna yana huma vouna auwarina hina terei babana ina amriyana yana apegha ina wanaroroi.”

Viyagohina Marana Badana

(Matthew 12:1-8; Luke 6:1-5)

23 Viyagohina au maratomna Yesu a tauvotagho maitehi payawa vaovaona hineninei hi nene'i, ma payawa anona hi tamihi po hi am'am. 24 Ma Pharisees* hi inanahi yana hi riwehi hipa, “Ma inanai! Ata raugagayo* yana havena po viyagohina au maratomna* we nana'arena hita dewai!”

25 Ma i paribeehi ipa, “O hiyavi bo e'egha? Da David ana rava maitehi am hi voiyehi ma egha ahi yam, ^{▼▼2:251 Samuel 21:1-6} 26 Ma David, Maimaituwa a au Numa i rui, Abiathar na haugana, yana tauna Gudutaupuyoweina Gheghetehaharana, ma na payawana Maimaituwa auwarina hi amverenei, yana wairaugagayona po gudutaupuyoweina*'ava ahi yam, ma David ana rava maitehi i verehi po hi ani.” 27 Autepana i riwehi ipa, “Aniviyagohina maratomna yana Maimaituwa i terei po rava ina haguhi, ma egha itapa rava viyagohina maratomna hina hagui. 28 Ta'u Rava Natuna vibadana auwari'u po ana riwa auwarihi da viyagohina maratomna ai badei.”